Er það allt í einu orðið refsivert athæfi að fara að lögum og reglum?

Það mætti skilja af þeim hugsjónasauðum sem að tjá sig í gríð og erg um þetta kvótakerfi er að það eigi hreinlega að refsa útgerðarmönnum fyrir að hafa keypt sér kvóta. Útgerðarmenn og sjávarútvegurinn allur hefur ekkert gert annað en að spila eftir þeim lögum og reglum sem að um greinina hefur gilt frá því að kvótakerfið var sett á og nú er það tortryggt af einhverjum hugsjónasauðum og nánast gert að refsiverðu athæfi að fara eftir lögum og reglum.

Auðvitað verðum við að finna lendingu í þessu máli, þannig að þau störf og þau verðmæti sem að eru bundin í greininni glatist ekki og hvernig sem kvótakerfinu verður breytt þá geti fyrirtækin starfað áfram. En málflutningur bloggheima þegar kemur að kvótakerfinu er alveg með ólíkindum. 95% þess kvóta sem að er nýttur í dag hefur skipt um hendur, með öðrum orðum verið keyptur. Það var gert eftir þeim leikreglum sem að stjórnvöld sjálf settu. Útgerðarmenn geta ekki borið ábyrgð á gallaðri lagasetningu stjórnvalda. Og það á ekki að refsa útgerðarmönnum með því að taka frá þeim einu eignina sem að er einhvers virði. Það er eins og að refsa mönnum fyrir að fara að þeim reglum sem að stjórnvöld settu á sinum tíma.

Fyrir mér skiptir nákvæmlega engu máli hvort að kvótinn sé í eigu útgerðanna í landinu eða þjóðarinnar. Þjóðin er ekki að fara að nýta úthafskarfa á Reykjaneshrygg eða Norsk-Íslenska síldarstofninn. Það gera útgerðirnar hins vegar. Þess vegna, hvaða breytingar sem að við gerum á kvótakerfinu, verður að tryggja að þær útgerðir sem að eru í greininni geti starfað áfram og að við auðveldum enn frekar nýjum útgerðum að komast að. Þetta tvennt gerist ekki með fyrningarleiðinni. Jú vissulega munu nýjar geta komist að, en þær útgerðir sem að voru í greininni fyrir, keyptu kvóta þær verða lagðar í rjúkandi rúst og með þeim munu tapast þúsundir starfa auk mikil verðmæti. Á tímum kreppu er ekki nokkrum stjórnmálamanni stætt á að standa fyrir svoleiðis málflutningi.

„Eigandinn heldur áfram að borga“

Athugasemdir

[Guðmundur (IP-tala skráð) 24.5.2009 kl. 00:22]

Það gleymist að nefna í tengslum við þetta mál að stóri munurinn á þessum samanburði er að ríkið hefur ekki gefið neinum hús til að byrja með líkt og með kvótann og þá eru fasteignir ekki sameign þjóðarinnar. Kvótinn var afhentur útgerðarmönnum sem síðan fengu að veðsetja hann og braska með hann t.d. með leigu ef þeir höfðu ekki sjálfir áhuga á að nýta hann. Ég get ekki séð að þessi málflutningur sé samanburðarhæfur.

[Sævar Finnbogason, 24.5.2009 kl. 00:33]

Fyrir mér skiptir nákvæmlega engu máli hvort að kvótinn sé í eigu útgerðanna í landinu eða þjóðarinnar. Þjóðin er ekki að fara að nýta úthafskarfa á Reykjaneshrygg eða Norsk-Íslenska síldarstofninn.

 Þannig að það skiptir þá engu máli HVER Á KVÓTANN, þar sem þjóðin er ekki að nýta hann. Hversvegna ættum við þá að hafa skoðun á því hverjum og hvers lenskum útgerðarmenn selja kvótann? Hugsaðu þetta í samhengi við það og þá séru að það skipti máli hver á kvótann og hvað hann gerir við hann.

og annað: þjóðin er öll að "nýta" einsog þú kallar það því þetta er takmörkuð auðlynd og því gætu hún bara ekki farið að veiða þó hana langað til. Hugsaðu þetta í samhengi við það og þá séru að það skipti máli hver á kvótann og hvað hann gerir við hann.

[Sævar Finnbogason, 24.5.2009 kl. 00:39]

Og enn frekar fyrst þú talar um að útgerðin sé löghlýðin og því ætti hún að vita að Í 1. gr. fiskveiðistjórnunarlaga segir orðrétt: Nytjastofnar á Íslandsmiðum eru sameign íslensku þjóðarinnar.

Svo mörg eru þau orð. Hinsvegar viljum við halda bestu útgerðarmönnum í greininni, það gefur augaleið, svo eins og þú segir verðum við að finna lausn sem verður til þess. Hinsvegar mun þessi háværi sérhagsmunahópur halda áfram að berjast fyrir sínu máli, enda um mikla peninga að tefla og því mun aldrei verða hægt að semja eitthvað við þá.

[Ellert Júlíusson, 24.5.2009 kl. 00:46]

Ef taka á kvótann af fólki sem hefur keypt hann dýrum dómum (eða leigt) hvers vegna ekki að ganga í reikninga kvótakónganna sem liggja á hundruðum milljóna sem þeir eiga ekki og hafa aldrei átt. Má einnig benda á og spyrja að hverjum þeir borguðu til að láta tryggja þessar innistæður við hrun bankana.

Ekki bað ég um það.

[Grétar (IP-tala skráð) 24.5.2009 kl. 08:05]

Eggert er hér að vísa í Rússland 1917.  Þá gerðist einmitt nákvæmlega þetta.  Helvítis auðvaldið var vængstýft og auðnum var dreift til íbúa landsins sem náttúrulega átti auðinn upphaflega.  Lifi byltingin ! Lifi byltingin!  Drepum auðvaldið!  Lifi kommúnistaflokkurinn!!

Þetta er náttúrulega svo gersneytt öllum rökum að ég nenni ekki að lesa fleiri blogg um þetta.  Ég ætla að leyfa þessum helv. kommúnistum að eiga þetta.  En þú mátt vita að það er ennþá til hugsandi fólk í þessu landi og það vita þeir menn sem hafa baslað í útgerð öll þessi ár og tekið áhættuna af rekstrinum og hirt afganginn þegar vel hefur árað og borið hallann hin árin. 

[Hafsteinn Viðar Ásgeirsson, 24.5.2009 kl. 09:16]

Þetta er nú varla flóknara en það, en að þeir sem settu lánsfé úr bönkum í "kvótakaup" voru hreinlega að gambla með peninga sem þeir ekki áttu. Nákvæmlega eins og þeir sem tóku fé að láni í Kaupþing og keyptu hlutabréf í bankanum sem urðu verðlaus á einni nóttu, en skuldin stendur ennþá? Þeir sem versluðu með kvóta gerðu það með galopin augun, vitandi að kvótinn var ekki eign þeirra sem seldu. Eða samkvæmt laganna hljóðan máttu þeir vita það. Þeir fá þó 20 ár og geta sjálfsagt leigt inná sig það sem á vantar, ef þeir standast samkeppnina. Annars koma aðrir til skjalanna, en atvinna fiskvinnslufólks og sjómanna er algerlega tryggð. Allt tal um annað er glórulaus hræðsluáróður LÍjúgara.

[Fannar frá Rifi, 24.5.2009 kl. 11:39]

"Hinsvegar viljum við halda bestu útgerðarmönnum í greininni, það gefur augaleið"

Sævar heldurðu að þeir nennu þessu mikið lengur? að vera sakaðir um að vera þjófar og dusilmenni ár eftir ár? ofan á það rignir hótunum yfir þá frá stjórnmálamönnum sem eru á atkvæðaveiðum.  það er bara komið svo að margir hæfustu útgerðarmenn landsins eru að gefast upp. nenna ekki lengur að berjast.

því það eru þeir sem eru að berjast. undanfarin "góðæris" ár þá var kreppa í sjávarútvegi. menn börðust við að halda lífi í greininni á meðan dollarinn var í 50 krónum og evran í 75. þeir sem gátu ekki rekið fyrirtæki eða nenntu því ekki, eru farnir úr greininni. þeir sem eru í sjávarútvegi í dag eru bara þeir sem hafa hugsjón til þess. 

og auðvitað er nýtingarrétturinn eign, kvótinn var settur á af stjórnvöldum til þess að takmarka frjálsarveiðar. þeim sem stunduðu útgerð var bannað að veiða eins og þeir gerðu áður. auðvitað áttu þeir sem lögðu allt sitt undir í sjávarútvegi að fá aflaheimildirnar á sínum tíma. eða ætlar einhver hérna að halda því fram að því hefði verið vel tekið árið 1986 af landsmönnum ef sagt hefði verið að takmarka ætti frjálsar veiðar og að útgerðir ættu að borga ríkinu pening fyrir takmarkaðar veiðar? ef menn halda því fram þá eru þeir búnir að ljúga ansi vel að sjálfum sér.

[magnus44 (IP-tala skráð) 24.5.2009 kl. 12:40]

Þjóðin lánaði manni húsið, leigulaust, maðurinn stofnaði ehf og seldi eheffinu húsið sem hann átti ekki, ehffið tók lán og greiddi manninum andvirði hússins. Maðurinn eyddi peningunum í lúxus, hlutabréf ofl. og lagði dávæna summu inn á reiknig í Lux í nafni félags sem hann stofnaði á Tortilla......................en nú vill þjóðin fá húsið aftur og skal það afhendast í áföngum (herbergi fyrir herbergi) á 20 árum.

Hins vegar fer eheffið líklega á hausinn, þannig að þjóðin, sem á bankann, fær skellinn, lánið sem veitt var til kaupa á þýfinu fæst ekki greitt.

Sem þýðir að þjóðin kaupir í raun sitt eigið hús á uppsprengdu verði.

Það býður svo uppá að þegar helmingaskipta-flokkarnir komast aftur til valda geta þeir  lánað sínum manni húsið leigulaust á nýjan leik.

Helmingaskipta-flokkarnir munu líklega komast til valda innan skamms tíma, af því að þjóðin er óánægð með að nýja stjórnin geti ekki reddað málunum í hvelli sársaukalaust og þjóðin neitar að horfast í augu við raunveruleikann.

Venjulegur íslendingur er á móti svokallaðri spillingu, ef hann fær ekki að taka þátt í henni sjálfur.

[Hafsteinn Viðar Ásgeirsson, 24.5.2009 kl. 13:50]

Hann Fannar kemur oft með eitthvað djúphugsað og hann bregst ekki nú fremur en fyrri daginn. Hver hefur verið að kalla útgerðarmenn "þjófa og dusilmenni"??? Ég hef hvergi séð það nema frá þér, það er bara ekki það verið er að ræða hér. En að halda því fram að þeir sem eru í útgerð í dag séu akkúrat þeir einu sem það geta er álíka fráleit þvæla. Þú veist það jafn vel og ég, að sumir í þeim hópi hafa hreinlega gert út á kvótaleigu og lagt skipum eða beitt á skrap til að gera slíkt mögulegt, ertu að tala um þá aðila þegar þú ert að lýsa ótta þínum við að menn fari úr greininni? Þeir mega fara mín vegna þessir gæjar, við þurfum að halda hinum sem gátu gert út á leigukvótanum, þeim er greinilega ekki fisjað saman.

Svo eru hinir sem hafa komist þangað sem þeir eru með því að landa framhjá vigt og skíra upp tegundir við löndun, og annað þaðan af verra, ég er viss um að þú veist hvað ég er að tala um, það vita allir sem eru í kringum greinina og hafa verið á liðnum árum. Allir nema Friðrik Jón og Co. Ekki fjölmennur hópur en þar eru innanum menn sem eru álitnir máttarstólpar af sumum.

Fyrir alla muni, farðu nú ekki að gera einhverja dýrðlinga úr útgerðarmönnum dagsins í dag, þó þar séu afar margir góðir drengir sem eiga allt gott skilið og munu klárlega spjara sig í hvaða umhverfi sem þeim verður boðið uppá.